Luna nova

La luna nova ncopp’ ‘a lu mare

stenne na fascia d’argiento fino;

dint’a la varca nu marenare

quase s’addorme c’ ‘a rezza nzino….

Nun durmì, scétate, oi marenà,

votta sta rezza, penza a vucà.

Dorme e suspira stu marenare

se sta sunnando la nnammurata…

zitto e cuieto se sta lu mare,

pure la luna se nc’è ncantata…

Luna d’argiento, lass’ ‘o sunnà,

vaselo in fronte, nun ‘o scetà…

Comme a stu suonno de marenare

tu duorme, Napule, viate tte!

Duorme, ma nzuonno lacreme amare

tu chiagne, Napule! Scétete, scé!…

Puozze na vota resuscità!…

Scétete, scétete, Napule Na’!…