Autunn ai giardin pubblich

Vedi con la ment on bagain che lì

el pedala sora ‘na maccchinètta.

On giovin òmm el ciappa del borsin

ona moneda e ‘l ghe paga ‘n’alter gir.

Intant ‘l tègn in man ona barchètta

e vèrs la vasca s’invien a camminà.

Quèll bagain seri mi col mè papà

e adèss la ment la lassa ‘l post ai oeucc

per vedè quèll che gh’è intorna incoeu

a Porta Venezia, in sti nòster giardin

indoe hinn passaa generazion de fioeu.

In sto autunn troeuvi tusscòss cambiaa.

Lì, in mèzz, gh’è la vasca bandonada

e i bagai giughen più cont i barchètt.

I castègn d’India borlen giò per tèrra

sora i foeuj giald che ghe fann de tappee.

Sora ‘na banchètta gh’è settaa on vècc

cont i oeucc avèrt sbarattaa sul nient…

(Carlo Albertario – Milan, el 29 de ottober del 2004)