A’ gatta d”o palazzo ‘A gatta d’ ‘o palazzo

Trase p’ ‘a porta,

pè nu fenestiello,

pè na fenestra, si t’ ‘a scuorde aperta,

quanno meno t’ ‘aspiette.

Pè copp’ ‘e titte,

da na loggia a n’ata,

se ruciulèa pè dint’ ‘a cemmenera.

E manco te n’adduone

quann’è trasuta:

pè copp’ ‘o cornicione

plòffete!, int’ ‘o balcone,

e fa culazione

dint’ ‘a cucina toia.

E’ ‘a gatta d’ ‘o palazzo.

Padrone nun ne tene.

Nunn’ è c’ ‘a vonno male,

ma essa ‘o sape

che manc’ ‘a vonno bene.

Te guarda cu dduje uocchie speretate:

lèsa.

N’ha avute scarpe appriesso e ssecutate.

E’ mariola!

Ma ‘a povera bestiella, c’adda fa?

E’ mariola pecché vò mangià.

E’ mariola…

Chest’ ‘o ddice a’ ggente;

ma i’ nun ce credo, pecché, tiene mente:

tu lasse int’ ‘a cucina,

che ssaccio…

nu saciccio.

Làsselo arravugliato

dint’ a na bella carta ‘e mille lire.

Tuorne ‘a mattina:

‘a mille lire ‘a truove, che te crire?

Nzevata. Ma sta llà.

Eduardo De Filippo

29 novembre 2019 | Categorie: antologia, diletto dialetto, poesia | Tags: 'A gatta d' 'o palazzo, Eduardo De Filippo | Lascia un commento